Dr Darryn Joseph
Tērā te kōrero: “Ekehia ngā toi maunga kia whitikia e te toiawe haukura o te atatū…”
Tēnā koutou e ngā ringa tuhi, e ngā ringa toi. He pōwhiri tēnei nā Toitoi ki a koutou e ngana ana ki te whakaputa i ō tuhinga, i tō mahitoi ki te ao. Ā, ko Toitoi te waka.
Nō hea tēnei? Nō Ngāti Maniapoto ahau, ko Darryn Joseph tōku ingoa. Āe, ko Tākuta Hōhepa tēnei. He pāpā, he kaiako, otirā, he kaituhi reo Māori ahau. Ko tātou kei te mōhio nō mai anō, mai anō i te wā o ngā tūpuna tēnei mea te pūrākau, te pakiwaitara, te kōrero ahiahi, ā, tau mai ana ki ēnei rā kei te kawea tonutia ngā kōrero ā-iwi, ngā hitori ā-hapū, ngā paki ā-whānau e tēnā, e tēnā o tātou.
Puta noa i Aotearoa kei te puta ngā reo o te taiohi. Ko te ao Māori e ngunguru nei! Nō reira, he kōrero hei tuhinga māu? Tēnei mātou e hikaka ana te kite atu i ō tuhinga! Tukuna mai ō pakiwaitara, ō toikupu, ō kupu waiata, ō tuhinga roa, ō manu kōrero – he momo tuhinga atu anō rānei! Tukuna mai!
Mēnā ka whiriwhirihia tō mahi hei tānga ki Toitoi ka mahi tahi me mātou ki te whakatikatika kia eke panuku te tuhinga.
Ka mutu, he ringa toi koe? Pai! Tukuna mai tō mahi toi – mōhio tātou te Māori he toi whakairo, he rau kōrero. Arā, he kōrero nui tō te toiataata.
Ki te whiriwhirihia tō mahi, ko te painga, ka tae atu tō mahi pārekareka ki te hunga taiohi whānui. He huarahi tēnei e puta ai tō ake titiro ki te ao.
Ka nui tā mātou mihi ki a koe, ki tō reo ihiihi, ki tō reo taketake.
Ā tēnā, kia ohooho pea te ngākau i te tirohanga mai ki ngā mahi taiohi kua oti kē i a Toitoi te tā. Hei whakamutunga māku: Tēnei mātou te noho mataara nei kia tae pai mai ō mahi!
Kia kaha, kia kaikaha, kia auaha! Kia ora mai tātou.
